أكيد بتفكر هتعمل إيه؟
هتشتغل على إيه؟
هتبدأ إمتى؟
طيب هتبدأ في إيه؟
والأهم أنك بتسأل نفسك "هل الموضوع يستاهل أصلًا؟"، "هل أقدر أحقق حاجة؟"
وإجابتي أنت أكيد عارفها! أيوه تقدر وتقدر جدًا كمان.
عشان كده قولت بما أن العيد يعتبر في أول السنة، يبقى لازم عيدية النشرة يكون فيها مثال عملي للي ممكن تحققه.
فهحكيلك النهاردة ملخص لحوالي 15 سنة من التعلم الذاتي والبداية من الصفر، بعد سن الـ30.
عن العبد لله!
وليد طه، مصري وأنت تعرف أني صانع محتوى، لكن ده ١٪ بس.
لأنك لو دخلت على لينكدن، هتلاقيني كاتب:
Copywriter, UX Writer and translator with PR and Digital Marketing Background. A Full Stack Content Creator By Night!
والمكتوب ده وأكتر منه، علمته بنفسي خلال السنين اللي فاتت، والهدف الوحيد من ذكرها بجانب التفاصيل اللي هتقراها، هو تشجيعك… لأني بدأت بعد التلاتين.
الرحلة باختصار:
🗓️2008: سافرت الإمارات بفيزا "بناء حجر" عشان أشتغل فرد أمن في مشروع في الصحرا، وكان وقتها عندي ٣١ سنة ومعنديش أي مهارة تذكر… صفر!
🗓️2009: أخر السنة دي كنت بحضر نفسي عشان أدور على شغل تاني في مجال تاني، بعد ما قضيت نص ٢٠٠٨ وكل ٢٠٠٩ مذاكرة (اتعلمت إنجليزي وأوفيس وشوية فوتوشوب بنفسي) لغاية ما اشتغلت مع الـ HR، بس سيبت الشركة واشتغلت Sales في شركة تانية براتب تقريبا أعلى بـ 10 مرات.
🗓️2010: أثناء شغلي مع الـAV واللي مكملش سنة جالي عرض عشان أشتغل HR-CO بعقد ٩ شهور براتب أعلى، فسيبتهم وروحت، وأثناء العقد ده ولغاية أخر ٢٠١٠ كنت مهتم بالمحتوى قوي وبالسوشيال ميديا والتسويق الالكتروني، فكنت بذاكرهم!
🗓️2011: اتجوزت ورجعت مبيعات تاني في شركة شقق فندقية لوقت قصير، وكنت مكمل مذاكرة عادي وفي نفس الوقت بدأت أشتغل في التصوير بس بشكل احترافي حر، يعني فريلانسر.
🗓️2012: نزلت مصر زيارة وكنت مقدم في شركة عندها "محرك بحث خاص بالسفر" في وظيفة SOCIAL MEDIA EXECUTIVE MENA بس عقد محدد سنة بس. وجالي إيميل وأنا في مصر وعملت مقابلة سكايب وقبلت، ورجعت استملت.
🗓️2014: أثناء شغلي معاهم اتعلقت بالكتابة والترجمة، وبعد ما سيبتهم بدأت أدون في كذا موقع منهم "هاف بوست" وكمان تدوين شخصي على فيسبوك، وكان حلمي أشتغل في حاجة زي دي، لكن للأسف الكورسات كانت قصيرة جدا وبارقام خيالية، يعني مش فايدة حقيقية، أو خلينا مش للمبتدئين. فاستمريت في شغل السوشيال ميديا "حُر"، وكان عندي وقتها جروب اسمه "علم نفسك"، وهدفه أن الناس اللي بيتعلموا يشيروا لينكات مفيدة، ويساعدوا غيرهم.
وفي يوم وأثناء ما كنت مستني أول مولود، لقيت بوست حد مشيره عن منحة لتعليم الصحافة في جريدة سعودية.
قدمت وكتبت القطعتين اللي طالبينهم، وبعد كام يوم وصلني إيميل عايزين يقابلوني، فشرحتلهم إني مسافر وراجع بعد شهر، وطبعا قولت كده الفرصة راحت 😅 لكن لما رجعت وبعد شهر بالظبط وصلني إيميل تاني منهم عشان المقابلة 🥳، وروحت قابلتهم، واتقبلت في منحة مدفوعة ٨ شهور مع إمكانية التوظيف بعد الانتهاء، ولكنهم شغلوني بعد ٦ شهور بس.🥇
🗓️2016: بعد شوية أزمات مالية في الجريدة، بدأت أدور على شغل تاني، وربنا وفقني بشغل مترجم ومحرر مع واحدة من أكبر الـ PR AGENCIES في العالم.. ودي كانت بداية دخولي لعالم الـ PR.
🗓️2017: رجعت أعيش لوحدي تاني لظروف عائلية.
🗓️2020: انتقلت لشركة تانية كبيرة في الـ PR & Advertising… لكن ولادي وعيلتي وحشوني (ربنا رزقني بولد تاني) ومكنتش شوفت إبني اللي لسه مولود سنة بحالها بسبب كوفيد، فقررت الاستقرار معاهم.
🗓️2022: مرحلة جديدة في حياتي تمامًا، لأني شغال 3 حاجات في وقت واحد (شغل أساسي، شغل حر، قناة يوتيوب)، والحمد لله مع نهايتها قدرت أحسن من قناتي والمحتوى اللي بعمله.
هتقولي"أما قصة بصحيح، عايز إيه بقى؟!" هقولك:
لو شايف نفسك معندكش أي مهارة عشان تعمل حاجة في حياتك، فالتغيير في إيدك.
لو شايف نفسك كبرت ومفيش وقت "فطول ما أنت عايش عندك وقت".
متدخلش تنام إلا وأنت أحسن من امبارح ولو بكلمة.
اتعب دلوقتي عشان تتعب أكتر بعدين في مرحلة أعلى وأفضل.
مفيش حاجة اسمها شغف، فيه حاجة اسمها "الحاجة" والاستمرارية.
لو شايف نفسك مش موهوب، فالموهبة ممكن تتبني.
اللي عايزك تبصله مش المرحلة الأخيرة، لكن البداية كانت فين، وإزاي المشوار مكانش سهل، وليه أنت عندك نقطة بداية أحسن مني بكتير، وممكن تحقق أكتر مني بكتير، وبشوية استمرارية وتأسيس معرفي والتزام… هتوصل لأبعد ما تتخيل.
🗓️وأخيرًا خلي دول جزء من حياتك:
ليس من النبل في شيء أن تكون أعلى منزلة من غيرك، إنما النبل الحقيقي أن تكون أعلى منزلة مما كنت عليه من قبل.
-إرنست_هيمنغواي
⁃Start where you are. Use what you have. Do what you can.
بالتوفيق.
وليد طه
متنساش تشترك في النشرة وتعملها شير.
كل سنة وأنت طيب.
🥇 لحجز مكالمة Mentor:
https://minimization.gumroad.com/l/Mentorship
أو ممكن تحجز عن طريق باي بال:
🚨 أكتب في الرسالة أن المبلغ مخصص لجلسة مينتورشيب، وضيف الإيميل بتاعك في الرسالة.
شكرا ، فعلاً الكلام ده يعطني دفعه كبير للاستمرارية
من أعماق القلب، أكتب لك هذه الكلمات البسيطة التي قد لا توفيك حقك، لكنها تحمل بين حروفها صدقًا عميقًا وامتنانًا لا يوصف.
كنتَ بعد الله النور الذي أضاء عتمة روحي، واليد التي ساعدتني – دون أن تدري – في النهوض من سنواتٍ طويلة من الضياع، والتشتت، والهروب التجنبي من كل ما يؤلمني ويكسرني. كلماتك وصلت لقلبي مباشرة، لم تكن مجرد محتوى… بل كانت رسالة حياة. رأيت فيك الصدق، والنية الطيبة، والوعي العميق الذي طالما كنت أبحث عنه.
لأول مرة منذ سنوات، شعرت أني أستحق أن أعود لنفسي، أن أتصالح معها، أن أواجهها بحب لا بخوف. وكان هذا بفضل الله أولًا، ثم بفضل ما قدمته من نور وفهم ودعم حقيقي، حتى ولو لم يكن موجهًا لي بشكل مباشر.
أسأل الله أن يبارك لك في علمك، ونيتك، ووقتك، وأن يرزقك من حيث لا تحتسب.
اللهم اجعل كل كلمة نطقتها سببًا في هداية نفس، وكل لحظة أعطيتها لخلقك في ميزان حسناتك.
الله يفتح لك أبواب الخير والرزق والسعادة كما فتح لنا أبواب الأمل والوعي والبصيرة.
الله يحفظك من كل شر، ويرزقك راحة البال، وطمأنينة القلب، ونور الطريق.
خالص الشكر والامتنان من شخص وجد نفسه من جديد بسببك.
ومش بروح أنام غير وأنا عملت أي خطوة بسيطة… تأكدلي إني بعون الله أحسن من امبارح.
أخوك / مصطفى شرف