بتزهق بسرعة؟ حلك عندي
ميكانيكي بني آدمين | العدد #8
بس الإجابة مش هتعجبك!
متتخضش… متتخضش 😅
بتزهق لأنك "معندكش مساحة للزهق" ومخك دايما مشغول وقدامك اختيارات كتير وقراراتك أقل.
أيوه بالظبط... لو إديت نفسك فرصة للملل الحقيقي، من غير تليفون وسوشيال ميديا وجيمنج طول النهار، هتبدأ تعالج أكبر مشكلة كل الناس بيعانوا منها النهاردة.
الحقيقة هما 3 مشاكل ولازم تحلهم بأي تمن، وده طبعا في حالة لو عايز تحقق وتعمل حاجة كويسة في حياتك.
الأولى هو علاج الـ Short attention span اللي عندك، واللي سببها الفيديوهات القصيرة وبوستات البوب ساي.بأنك تبعد عنها تمامًا وتبدأ تتفرج على وثائقيات وتقرا كتب حقيقية.
التانية هي الـFOMO لا لا مش الهومو.. الفومو!😅اختصار لـ Fear of missing out... يعني إيه؟يعني خوفك الدايم من أنك متلحقش كورس أو معلومة أو فيلم أو لعبة أو جهاز جديد أو أي حاجة شايفها مميزة لأن مؤثر قالك لازم تستخدمها وعشان تبقى زيه!
التالتة هي انتقالك من الـ Instant Gratification أو الإرضاء الفوري/السريع/الفوري، للـ Delayed Gratification أو الإرضاء المؤجل.
في بودكاست “شاي بلبن Talks” غلطت وقولت الإتنين “إرضاء مؤقت” معلش بقى السن وكده 😁
لازم تشوفوا الحلقة… هتعجبكوا جدا!
الأولى والتالتة اتكلمت عنهم في حلقات كتير قوي وبالتفصيل في سلسلة “أحسن من امبارح” وبودكاست “قهوة وكتاب” وبودكاست “ميكانيكي بني آدمين”.
أيوه اتكلمت عنهم كتير قوي عشان مهمين فوق ما تتخيل… ولسه هتكلم عنهم أكتر!
التانية: ليها حلقة حلوة قوي بتتصور.
بس خلينا نتلكم سيكا عنها النهاردة ونسأل ليه دي مشكلة أصلًا؟!
لأنها هتحط ضغط عليك، وهتحسسك أنك متأخر عن الناس ومش قادر تبقى زي الناجحين اللي شايفهم، واللي نجاحهم يتلخص في سفرية وجهاز جديد وكام متابع ولا شوية أكل مليانين جبنة ونوتيلا وبياكلوهم وهما بيقولوا حاجات زي بتدوب في روحك وحاجة أخر مرئعة.
والنتيجة أنك هتبقى زي اللي دايما جعان ومفيش أي حاجة مشبعاه وأوقات كتير مبيعرفش ياخد قرار حاسم في مواقفه، ولو ضيفنا أول مشكلة مع دي، يبقى هيسيب اللي في إيده،قبل ما يخلصه، ويروح يبدأ في حاجة تانية خالص... وده هيؤدي لتشتت وضياع ومعرفة سطحية وعدم نتيجة حقيقية.
الحل أنك تقلل الاختيارات اللي حواليك، متحفظش بوستات كتير، ولو حفظت بوست وتاني يوم لقيت واحد غيره، يا تخلص اللي حفظته يا تعمله Delete وتبدأ في بتاع النهاردة.ابدأ في كورس واحد بس.قلل تفاعلك مع المؤثرين اللي دايما مسافرين ولابسين وواكلين وشايلين أخر حاجة.
لو عندك سؤال أو تعليق اكتبهولي
حلك أنك ترجع للبساطة شوية، وقت شاشة أقل،مش لازم دماغك تكون مشغولة طول الوقت،اختيارات أقل في كل حاجة تقريبا، وممكن تبدأ بشعرك ولبسك وأكلك وأوضتك.بلاش تشتري 5 كتب، هو كتاب واحد وخلصه.من الأخر... قلل خيارات وكتر قرارات.
متنساش تقرا الأعداد اللي فاتت وتشترك في النشرة عشان توصلك أول بأول.
عشان أقدر أكمل في إنتاج المحتوى ومن غير ما أطلب منك إشتراك أو دعم مباشر، بدأت أنشر لينكات تقدر تشتري منها وأنا هاخد عمولة، من غير أي زيادة عليك، بالعكس دي فيها خصم كويس قوي.
تقدر تشوف العروض هنا:
https://beacons.ai/walidtaha/3dprintinglaserengravingmore
OVER & OUT!
ازاي ارجع زي اول بعد ما انتكست؟